BBC-də yeni təyinat: rəhbər postuna Google-un sabiq meneceri gətirildi.

BBC-yə Google-un sabiq top-meneceri rəhbər təyin olundu

BBC-nin Direktorlar Şurası teleradio şirkətinin baş direktoru vəzifəsinə Google-un Avropa, Yaxın Şərq və Afrika (EMEA) regionu üzrə keçmiş prezidenti Mett Brittini təyin edib.

Finera.az BBC-yə istinadən xəbər verir ki, BBC-nin baş direktoru həm korporasiyanın baş icraçı direktoru, həm də baş redaktoru funksiyalarını yerinə yetirir. Bu vəzifə şirkətin Böyük Britaniya və digər ölkələrdəki fəaliyyətinə - yaradıcılıq, redaksiya və əməliyyat idarəçiliyinə rəhbərliyi əhatə edir.

Mett Brittin bu vəzifədə illik 565 min funt sterlinq, yəni təxminən 1.2 milyon manat maaş alacaq.

Onun vəzifəsinin icrasına mayın 18-dən başlayacağı bildirilir. Həmin tarixədək baş direktor vəzifəsini müvəqqəti olaraq Rodri Talfan Devis icra edəcək.

Qeyd edək ki, Mett Brittin 2007-ci ildən Google-da fəaliyyət göstərib, bir müddət şirkətin Böyük Britaniyadakı biznesinə rəhbərlik edib və ötən il EMEA regionu üzrə rəhbər vəzifəsindən ayrılıb.