MBA dövrü zəifləyir: universitetlər artıq CEO-lara qısamüddətli təlim satır.

Son illərdə MBA və magistr proqramlarına müraciət sayının azalması bir çox universiteti yeni strategiya qurmağa məcbur edib. Hazırda isə biznes məktəblərinin əsas gəlir mənbələrindən biri “Executive Education” adlanan rəhbər inkişaf proqramları hesab olunur.
Səbəb sadədir. Gənc mütəxəssislər artıq iki il vaxt və böyük məbləğ xərcləyib MBA oxumağa əvvəlki qədər maraq göstərmir. Əvəzində iri şirkətlər öz top-menecerlərini bir neçə günlük intensiv proqramlara göndərərək daha sürətli nəticə əldə etməyə çalışırlar.
Bu model universitetlər üçün də daha sərfəlidir. Bir neçə gün davam edən rəhbər təlimləri həm daha az resurs tələb edir, həm də yüksək qiymətə satılır. Üstəlik, bu proqramlarda iştirak edən şəxslər əsasən yüksək vəzifəli rəhbərlər olduğu üçün networking imkanları da kursların dəyərini artırır.
Digər tərəfdən, bazarın sürətlə dəyişməsi də bu trendi gücləndirir. Şirkət rəhbərləri illərlə akademik proqram oxumaqdansa, süni intellekt, rəqəmsal transformasiya, risk idarəetməsi və liderlik kimi mövzularda qısa müddətdə aktual bilik almağa üstünlük verir.
Ekspertlər hesab edir ki, yaxın illərdə bir çox nüfuzlu universitetlərin rolu dəyişəcək. Onlar təkcə diplom verən təhsil müəssisələri yox, iri şirkətlərin strateji tərəfdaşına çevriləcək. Bu isə təhsil bazarının iqtisadi modelini tamamilə yenidən formalaşdırır.